Links & ImagesElşən Qurbanov (d. 1962, Nərimanlı, Basarkeçər rayonu, Ermənistan SSR) — azərbaycanlı alim, elmlər doktoru, professor, I Qarabağ müharibəsi veteranı. Yaponiyada elmi iş müdafiə etmiş ilk azərbaycanlı alimdir.
Həyatı və təhsili
Elşən Mahmud oğlu Qurbanov 1962-ci ildə Qərbi Azərbaycanın Göyçə mahalının Basarkeçər rayonunun Nərimanlı kəndində anadan olmuşdur.
1979–1984-cü illərdə Azərbaycan Dövlət Universitetinin (indiki BDU) Fizika fakültəsində ali təhsil almışdır.
1986–1990-cı illərdə Sankt-Peterburq Dövlət Texniki Universitetində "Neft və qaz qurğularının hidrodinamikası, layihələndirilməsi və tikintisi" üzrə fəlsəfə doktoru (PhD) dərəcəsi almışdır.
1994–1996-cı illərdə Yaponiyanın Tsukuba Universitetinin Sosial və İqtisadi Planlaşdırma fakültəsində "Beynəlxalq Müştərək Müəssisələrin və Multi-Milli Korporasiyaların İdarə olunması" üzrə xüsusi proqramın fəlsəfə magistri dərəcəsinə yiyələnmişdir.
1996–1998-ci illərdə Tsukuba Universitetinin "İdarəetmə Elmləri və Sosial Siyasət" İnstitutunda "Yapon şirkətlərinin qeyri-müəyyən bazarlarda investisiyaları" mövzusunda dissertasiya müdafiə edərək elmlər doktoru adını almışdır. Bu göstərici ilə o, Yaponiyada elmi iş müdafiə etmiş ilk azərbaycanlı alim olmuşdur.
2011–2013-cü illərdə London İqtisadiyyat Məktəbində (LSE) "Beynəlxalq İqtisadiyyat və Xarici Siyasət" mövzusunda Böyük Britaniya diplomatları üçün xüsusi proqramı bitirmişdir.
Əmək fəaliyyəti
Əmək fəaliyyətinə 1983-cü ildə Dövlət Neft Şirkətinin Layihə İnstitutunda mühəndis kimi başlamışdır. SOCAR-da çalışdığı dövrdə Azəri-Çıraq-Günəşli layihəsinin İqtisadi əsaslandırılmasının koordinatoru, Xarici İnvestisiyalar İdarəsinin Marketinq və Kontraktlar Departamentinin müdir müavini kimi fəaliyyət göstərmişdir.
1998–2005: İTOCHU Korporasiyasının Azərbaycandakı nümayəndəsinin müavini, Yapon-Azərbaycan Neft Əməliyyat Şirkətinin (JAOC) STƏM, Əməliyyatlar, Dövlət və İctimaiyyətlə Əlaqələr üzrə Baş Koordinatoru;
2005–2010: AZPROMO-nun İxrac üzrə direktoru və Qazaxıstan nümayəndəliyinin rəhbəri;
2010–2011: Alternativ və Bərpaolunan Enerji Mənbələri üzrə Dövlət Agentliyinin "Strateji İnkişaf və İnvestisiya Layihələri" departamentinin müdiri;
2011–2013: Böyük Britaniyanın Azərbaycandakı Səfirliyinin Enerji Sektoru və İqtisadi Məsələlər üzrə baş müşaviri;
2018–2020: Kiçik və Orta Biznesin İnkişafı Agentliyinin (KOBİA) İdarə Heyəti Sədrinin müşaviri;
2020-ci ildən: "BİRGƏ" İnvestisiya Şirkətinin baş direktoru.
Elmi və pedaqoji fəaliyyəti
2013-cü ildən Şotlandiyanın Heriot-Watt Universiteti və Bakı Ali Neft Məktəbinin, 2020-ci ildən isə Azərbaycan Memarlıq və İnşaat Universitetinin (AzMİU) professoru kimi fəaliyyət göstərir.
3 kitabın, 70-dən artıq elmi məqalənin, habelə beynəlxalq hesabat və məruzələrin müəllifidir. Yaponiyada Təhsil Almış Azərbaycanlı Məzunlar Assosiasiyasının təsisçisi və uzunmüddətli sədri, Beynəlxalq Neft Mühəndisləri Cəmiyyətinin (SPE) üzvüdür.
Şəxsi həyatı
Birinci Qarabağ müharibəsi iştirakçısı və veteranıdır. Ailəlidir, 3 övladı var.Keywords##ElşənQurbanov #QurbanovElşən #Göyçə #Basarkeçər #Nərimanlı #ElmlərDoktoru #Professor #Yaponiya #Tsukuba #AzMİU #BANM #KOBİA #QarabağVeteranı #GöyçəZiyalıları #Alimlərimiz
