Əlavə Şəkillər, LinklərMəmmədov Rasim Qara oğlu (d. 1950, Nərimanlı, Basarkeçər rayonu, Ermənistan SSR — ö. 2025, Mehdiabad, Abşeron rayonu, Azərbaycan) — azərbaycanlı alim, fizika-riyaziyyat elmləri doktoru, professor, fizika üzrə Nobel Mükafatı müsabiqəsinin iştirakçısı, "Tərəqqi" medalı laureatı.
Həyatı və təhsili
Rasim Qara oğlu Məmmədov 1950-ci ildə Qərbi Azərbaycanın Göyçə mahalının Basarkeçər rayonunun Nərimanlı (Hüseynquluağalı) kəndində anadan olmuşdur.
1967-ci ildə Nərimanlı kənd orta məktəbini qızıl medal ilə bitirmişdir.
Azərbaycan Texniki Universitetinin Avtomatika və Hesablama Texnikası fakültəsinə daxil olmuş, yüksək təhsil göstəricilərinə görə III kursdan sonra təhsilini davam etdirmək üçün Moskva İdarəetmə Problemləri İnstitutuna göndərilmişdir. 1972-ci ildə həmin ali məktəbi fərqlənmə diplomu ilə başa vurmuşdur.
Təyinatla Bakı Dövlət Universitetinin (BDU) Optika və molekulyar fizika kafedrasına göndərilmişdir.
1976–1979-cu illərdə BDU-da Radiofizika ixtisası üzrə aspirantura təhsili almışdır.
Elmi dərəcələri və elmi adları:
1983: Fizika üzrə fəlsəfə doktoru (fizika-riyaziyyat elmləri namizədi) elmi dərəcəsini almışdır.
1990: Dosent elmi adına layiq görülmüşdür.
2004: Fizika üzrə elmlər doktoru (fizika-riyaziyyat elmləri doktoru) elmi dərəcəsini almışdır.
2005: BDU-nun Optika və molekulyar fizika kafedrasının professoru seçilmişdir.
Elmi fəaliyyəti və Nobel Mükafatı namizədliyi
Professor Rasim Məmmədov yarımkeçiricilər və kontakt fizikası sahəsində fundamental tədqiqatları ilə tanınan dünya miqyaslı alimdir:
O, “Əlavə elektrik sahəli metal – yarımkeçirici kontakt fizikası” adlı yeni elmi istiqamətin banisidir. 2003-cü ildə bu sahədə 231 səhifəlik monoqrafiya nəşr etdirmişdir.
Onun "Real makro-, mikro- və nanokontaktlarda baş verən elektron proseslərin elmi-tədqiqatı və alınan mühüm elmi nəticələr" mövzusundakı kəşfləri bakalavr, magistratura və doktoranturanın tədris prosesində tətbiq edilir.
Fizika üzrə elmi kəşfin müəllifi kimi İsveç Krallığının Elmlər Akademiyasının təqdimatı ilə Nobel Mükafatına namizəd olmuş və Fizika üzrə Nobel Komitəsinin dəvəti ilə 2020 və 2023-cü illərin Fizika üzrə Nobel Mükafatı müsabiqəsinin iştirakçısı olmuşdur.
200-dən artıq elmi əsərin, o cümlədən 1 monoqrafiya, 4 dərs vəsaiti, 1 elmi kəşf, 6 ixtira və 50 elmi-publisistik məqalənin müəllifidir.
Əmək və rəhbərlik fəaliyyəti
1985–1990: BDU Fizika fakültəsinin Optika və molekulyar fizika kafedrasında baş müəllim;
1990–2005: Həmin kafedranın dosenti;
1999–2004: Fizika fakültəsinin dekan müavini;
2004–2012: Bakı Dövlət Universitetinin Fizika fakültəsinin dekanı;
2005–2025: BDU-nun Optika və molekulyar fizika kafedrasının professoru.
BDU Fizika Fakültəsi Elmi Şurasının, “Bakı Universiteti Xəbərləri” və “Journal of Baku Engineering University” jurnallarının redaksiya heyətinin, həmçinin Respublika Jurnalistlər Birliyinin üzvü olmuşdur.
Mükafatları və təltifləri
Azərbaycan Respublikası Prezidentinin Sərəncamı ilə "Tərəqqi" medalı;
"Bakı Dövlət Universitetinin 100 illiyi (1919–2019)" Azərbaycan Respublikasının yubiley medalı.
Şəxsi həyatı və vəfatı
2025-ci ildə vəfat etmiş, Abşeron rayonunun Mehdiabad qəsəbə qəbiristanlığında dəfn olunmuşdur. Üç övladı var.Açar Sözlər##RasimMəmmədov #MəmmədovRasim #Göyçə #Basarkeçər #Nərimanlı #FizikaElmləriDoktoru #Professor #BDU #NobelMükafatı #TərəqqiMedalı #GöyçəZiyalıları #Alimlərimi
